本地女明星轉型從商，搞生意仲可以上市嘅，印象最深刻係張玉珊嘅修身堂（8200）。荷李活都有一位有樣有身材嘅辣媽Jessica Alba，搞一間初創公司專賣嬰兒用品。
Jessica成功並非靠好運，最重要遇上會點石成金嘅美籍韓裔創業家Brian Lee，外界對公司上市都好有信心。
辣媽Jessica Alba嘅公司The Honest主要係環保、無毒害物質嬰兒用品網上舖，由於Jessica自己都有兩個小朋友，所以佢好明白父母點為子女揀最合適嘅用品。約兩年前公司開業時，Jessica諗住當社企咁做，冇諗過賺錢。經營模式類似布鞋TOMS，每售一件貨品，就捐一件貨畀慈善機構。但係公司創辦人之一嘅Brian Lee，對龐大商機又點會走漏眼！
The Honest以會員制吸客，每月訂購心水產品。公司由產品設計到消費、出售等整個進程都非常貼心，好快就招攬大批會員，又准許註冊會員每月定期購買綑綁式產品，營業額急速倍增，今年公司收入估計達11.7億港紙。公司自從舊年1月起幾次融資已集得5,200萬美金，最新一筆融資仲有成7,000萬美金。見勢頭好，公司亦準備上市大計，估值仲衝破78億港紙。假如Jessica Alba間初創成功上市，估計佢喺《財富》美國最具權力女性企業家榜中嘅排名可以升呢！
C+B
本欄逢周一刊出