iPhone 6未出，但一對蘋果孖仔的外形、規格等網上諜照，早已鋪天蓋地，究竟4.7吋及5.5吋會否同時推出，好快揭曉；此時日系SoftBank分別配置5.2吋和4.5吋的Sharp手機竟然搶先入閘，除了軟硬件孖住上，「大孖」302SH的無邊框手感設計，更用盡屏幕闊度，而「細孖」303SH亦配置8款色彩鮮艷的外殼，各具賣相，趁iPhone 6正式發售前，先飲頭啖湯！
記者：陳國輝
攝影：陳永威
聽得最多的日系機名字，都來自NTT DoCoMo，SoftBank恍如在霧裏消失！據說，主因是改機難度各不同。以DoCoMo為例，由當地發售至成功解鎖再運到香港，可快至幾天完成；相反，處理SoftBank問題就好棘手，所花時間或長達數個月。近期玩家亦留意到一款如相框般薄邊的Sharp Aquos Crystal，同樣來自SoftBank，但預計今年內未必可與本港玩家見面。
機頂削剩3mm 無礙握手感
現時就連電視亦要玩「零邊框」，到底有甚麼好？各大品牌一直引以為傲的設計，就是提升屏幕佔機身空間的比例，令到畫質更加立體豐富，同時使外觀的細緻程度提高。例如今次介紹的302SH，機頂邊框被削剩只有3mm，與一般約1cm闊的手機比較，省了不少多餘空間，令屏幕更大，優勢立見。此外，大多在機側的音量鍵，也罕見地搬到屏幕下方，從而將厚度縮減至9.9mm，足見此機慳家之道，相當有誠意！
至於太貼邊會導致容易按錯鍵，多數是屏幕「過敏」而引致，但試用一會，302SH並無因手指頭輕壓於屏幕而誤按的問題，故此握手舒適度方面，並沒任何影響。
充電座加喇叭 叉住電睇片
以往的SoftBank包裝盒內只有電池（如可拆卸）、耳筒，連火牛也沒有，但今次竟附送充電底座，而且與302SH機身顏色襯到絕。底座右下角設長條形喇叭，當插上手機播片時，聲音會從這裏發出。如此簡單設計，當然不可要求有靚音色，但其實聲音比純用手機喇叭較為集中和大聲，加上一物兩用，可充電之餘，也可當作手機支架，算是有點新意。
4G效率實試
日韓機來港後，功能被削好平常，難得是今次改機，仍可正常使用LTE1800頻譜（亦即4G制式），立即實試網速有幾快。
Sharp AQUOS PHONE Xx 302SH
系統：Android 4.2
屏幕：5.2吋S-CG Silicon
重量：約147g
體積：132×70×9.9mm
處理器：Snapdragon 800 2.2GHz四核
功能：
支援本港LTE 1800頻譜、1,630萬像素CMOS鏡頭、1080p全高清拍片、IPX5/IPX7防水
銷售地點：三禾電氣（銅鑼灣富明街寶富大樓1H）