所謂新人事新作風，太古系新主席史樂山上任大約五個月，早前就公佈一系列人事調動，其中，太古地產（1972）𠵱家負責內地業務嘅董事白德利（Guy Bradley）將於明年1月起升任太地行政總裁。據聞，呢位候任行政總裁精通六種語言，廣東話都識㗎，大家咪喺佢面前用廣東話鬧佢呀。
白德利跟現任主席史樂山一樣，都係集團環球企業領袖培訓生出身，佢曾經被公司派到全球唔同國家或地區，履行唔同職務，巴布亞新畿內亞、中東、美國、台灣、越南、中國等等都有佢嘅足跡。
呢位喺英國牛津大學畢業嘅英國人，原來好有語言天份，英語之外，仲識廣東話、普通話、法文、日文同越南話，相信同佢過去咁多年被派往唔同國家工作，接觸唔同嘅地方、業務、人與事有好大關係。佢喺太古集團做咗27個年頭，首10年主力太古可口可樂業務，8年前加入太古地產。