踏入九月，距離滬港通十月開車越來越近，港交所（388）除咗不斷跟證券行做系統測試，向本地投資者講解注意事項、具體操作之類，據聞，港交所行政總裁李小加同環球市場聯席主管羅力呢兩個星期仲會飛去美國為滬港通做巡迴推介，向美國芬佬、投資者介紹呢個可以投資A股嘅平台。
李小加、羅力等人呢兩個星期將會去美國，跟唔同嘅基金經理、投資者見面，講解滬港通係乜東東，佢哋可以點樣透過滬港通投資A股等等。羅力作為李小加嘅得力助手，一早已經飛咗過去，李小加稍後先至起程。李小加以前係投資銀行賓架，做呢類巡迴推介係佢嘅強項，絕對冇難度。
而喺香港，港交所亦跟投資者教育中心同埋不同證券行協辦投資者教育講座，主要教投資者點樣投資A股。其實流程、交易用詞都唔難學，最難係搵到好股票，講到尾，都係咪做羊生羊太囉。