香港兩大「美人魚」歐鎧淳（Stephanie）同何詩蓓，噚日喺維園香港國際游泳公開賽女子100米自由泳決賽正面交鋒，結果何詩蓓以55秒77首先掂池，Stephanie就喺國際組三甲不入。
維園泳池噚日除咗手臂仲印住青奧logo嘅青奧大使Stephanie同泳手何詩蓓外，青奧滑浪風帆代表蔡穎姿都有到場打氣。喺青奧閉幕任持旗手嘅何詩蓓，雖然噚日喺百米自游出嘅時間唔及青奧奪銀嘅54秒61，但無損佢喺亞運爭牌嘅信心：「今日想游得更好嘅時間，但可能青奧後未調整得好好。」綽號「小美人魚」嘅詩蓓亦憑住呢面金牌，獲大會選為「最佳女泳員」，但佢嚟緊兩個月要應付中六學業同考8級鋼琴，所以一游完就返屋企溫書，連獎項都要教練代領。
至於全職嘅Stephanie就喺主項100米背泳以1分02秒93攞番面金牌，佢話：「青奧期間，我每日喺南京都有訓練，睇番呢兩日國際賽嘅成績，感覺訓練效果唔錯。」至於「最佳男泳員」就由史丹福大學畢業生謝旻樹奪得，過去4個月去咗密芝根大學練水嘅旻樹，喺50米蝶泳準決賽以24秒34刷新自己保持嘅香港紀錄，仲攞埋出年世錦賽嘅達標成績，所以放棄咗下晝嘅決賽。
識睇，一定係睇足英台【英波Live】：
http://soccer.appledaily.com
http://bit.ly/engballlive