最近出現兩件過海神仙，由歐洲大陸飛到英超，一黑一白。黑者，巴神巴洛迪利，神仙B也，索價1,600萬鎊入利物浦；白者，天使（廣東佬應該叫神仙）迪馬利亞，神仙D也，吸金近6,000萬鎊入曼聯，仲着起7號波衫！須知「曼7」乃紅魔聖衣，古有笠臣、貝斯，近有老簡、碧咸同C朗（後兩件更加因為靚仔撈到風生水起）。此Magic number seven，有唐僧吹雞召喚孫悟空之勢，戲碼焉能錯過？
雲帥近排勢危，連英甲球會正牌MK都收佢陀地四嚿，大有《古惑仔》山雞一眾落慈雲山波地俾肥屍兇番轉頭之恥。神仙D如今踏地標僮，雲帥當然計啱安全期；此舉正好轉移大眾視線，因人性皆愛希望，之前希望雲帥變法，如今更望金童派彩。君不見忠心曼迷已落「柯打」準備7號戰衣，待入秋後上街揚威（至於肥仔金正恩有冇佢Size，就真係窄窄哋），球會已即時吸金一筆。
至於紅魔會否即時被神仙打救，此文見街時已分曉，就算贏唔到，仲可以寄望後市表現：9月主場對QPR同韋斯咸試牛刀，10月仲有場西布朗（但愛華頓真係唔敢包），到時先對車仔已有足夠準備。開季前曼聯死忠「師兄」劉浩龍，已私底下批「後防有極大隱憂」，中晒！大家睇完對般尼一仗，如果表現對辦，之後都可以落注。寄曼聯喻香港：希望人間，永冇輸硬。
梁柏堅
填詞人+彩池人