大人有壓力，小朋友都一樣，許秋怡和丈夫王書麒最近鼓勵升小六的囝囝王綽枬（Cody）學打鼓，揮動鼓棍狠狠敲打，把心底的壓力轉化為美妙音樂。學了約兩個月的Cody已打上癮，更有意將來孖志同道合者組band。
撰文：比華利
許秋怡和王書麒靠登台搵食，他們的11歲獨子王綽枬耳濡目染都愛音樂，Cody兩年前便向媽咪提出想學打鼓，秋怡有見囝囝過去幾年學鋼琴和吹笛都是三分鐘熱度。為了不想Cody再費時嘥錢，秋怡決定要先觀察後決定，媽咪say no，Cody只有循網上途徑自學自娛。秋怡發現Cody的「鼓癮」中毒甚深，他會聽到音樂便拿起筷子當鼓棍起勢敲打，兩個月前，秋怡終答應囝囝開始學打鼓。
唔怕悶每日打
Cody越學越起勁，拍攝當日，僅兩個多月「鼓齡」的他狠狠敲打，夠rock又啱拍子，充滿節奏感。令秋怡和書麒聽得投入，兩名超粉開始隨節奏手舞足蹈。秋怡說：「以前我哋催佢練琴、練笛，呢次佢全部自動自覺，放學返嚟主動問准我打半個鐘鼓先做功課，我都畀佢輕鬆吓。或者以前揀學嘅樂器都唔係佢鍾意，只係父母一廂情願，難怪佢冇興趣，佢呢次真係好鍾意。」秋怡考慮到買一套鼓不便宜，還要佔據一定空間：「萬一佢學吓又停就麻煩，𠵱家佢揀啱就好，或者大力打鼓可以畀佢發洩咗平日嘅壓力，都真係唔錯。」
Cody打上癮，他強調每天非打不可：「我一星期學一堂，每堂半個鐘，我都嫌好短，每日唔打會身痕，雖然用力咁打，打完手臂同膊頭唔會攰，仲會精神返晒嚟。」Cody更有意將來長大跟志同道合者組band闖樂壇。Cody追夢夾band，秋怡和書麒卻不反對，書麒支持說：「冇所謂，鍾意音樂嘅係好嘅。」秋怡也說：「打鼓都係搵食技能，職業無分貴賤，佢鍾意開心就得。」
初學宜打電子鼓
只學了打鼓兩個多月的Cody，短短時間已掌握很多技巧，打鼓老師葉Sir大讚Cody有天份，他說：「始終呢項音樂需要體力，同手腳協調配合，所以最理想係小朋友8、9歲開始去學。」
對於初學者來說，他們先要用鼓棍敲打練習板，掌握了拍子，然後再轉往打鼓，葉Sir建議初學者不要買一套太貴的鼓，他說：「可以買一套電子鼓，價錢約萬多元，始終香港居住空間有限，佢哋邊學打邊戴住耳筒，咁唔會騷擾到鄰居。」
【壹錘佔中】8月31日 5pm直播
壹錘定音: http://hammerout.hk
和平佔中: http://occupycentral.appledaily.com
YouTube: http://bit.ly/occupycentral