【記者呂麗嬋報道】本地球員文彼得（Peter），被稱為港甲A餐、香港碧咸，顧名思義，全部同靚仔外形有關。新近拍下一輯打拳型男照，網上熱傳，「啱啱考到個泰拳教練牌，遇正朋友新店開張，咪影輯相，當做生招牌」。他近年積極考牌，「除咗泰拳，體適能同足球教練牌，仲有地產代理牌，遲吓想考埋的士牌」。
行年32，職業足球員生涯已近黃昏：「機遇你控制唔到，但有啲可以控制嘅，就唔可以偷懶。」
「考多幾個牌」增值
首屆「港超聯」9月開鑼，由南華過檔東方沙龍的守將文彼得，趁新球季開始前小段空檔，接受密集式訓練，月初考獲泰拳教練牌，「做足球員，體能訓練足夠，但泰拳係另一範疇嘅運動，要由紮手學起，考牌有難度，都要苦練」。
身形挺拔、五官精緻，簡單背心短褲，走在街上，已招來注目禮，Peter是球圈中出名的美男子，球場上死纏爛打，球場外一樣韌。
「有啲運動員退役讀番書，我呢啲同書冇緣嘅，就算𠵱家仲踢得都好，一樣要為將來做準備，我仲想考埋保險代理，不過因為（會考）中英文唔合格，考唔到」。學歷不如人，他坦蕩蕩，「試鏡做明星梗係好，但呢啲機遇，你控制唔到，考多幾個牌，呢啲唔係機遇，你可以控制」。
在屯門山景邨長大的靚仔波牛，比你我都清醒。
家人經營香舖小生意，中學讀職業先修中學，四兄弟排第三，「大哥叫嘉豪，對上個哥哥叫嘉禮，好細個夭折，中國人傳統，唔好再叫嘉咩，於是我就變咗彼得，英文名冇得走雞，一定叫Peter，細個介紹親自己，十個有八個咁答：你叫Peter？我叫Mary喎」。
Peter仔自細好動，決定做職業球員，就要做到底，家人沒太大反對，就等於支持。14歲入選亞洲17歲以下足球錦標賽的香港隊，18歲正式打職業賽，加入當時仍以青年球員為主的傑志。
坐冷板時間加操體能
除了足球員，14年來未做過其他工作，「踢咗咁多年，低潮難免，試過長期做後備，一季30場出得五場，仲要唔係踢足全場」。
「甲組周六比賽，周日放假，比賽前有限度操練，留力正式比賽，如果你認定冇出場機會，一星期可以唞足四日」。有人自怨自艾，他利用坐冷板的時間加操體能，「我唔想到有機會出場，冇本事去把握」。
在南華度過黃金七年，為球隊贏過錦標，也試過走漏前鋒，成為罪人，上季加盟東方，他說必定會盡力，踢好人生下半場。
【壹錘佔中】8月31日 5pm直播
壹錘定音: http://hammerout.hk
和平佔中: http://occupycentral.appledaily.com
YouTube: http://bit.ly/occupycentral