【殺到埋身】政府叫人「袋住先」，許麗明說很「大鑊」，「令人以為真係有嘢落袋，就好滿足，咁真係死硬，要攞番出嚟好難」。人大落閘，意料之內，但她最憂慮是中共忽然落「甜頭」，小修小補當皇恩浩蕩，𠱁港人收貨，這種期望管理，中共最耍家。所以她寧原地踏步，甚麼都不要，「咁先會有下一步，我哋先有機會再爭取真普選」。
原地踏步，因為對香港人沒有信心，「有啲人乜都唔理，等緊你畀嘢佢，根本唔會思考係真定假」。她說塞進口袋裏的東西，很難取回來，因為香港人容易安於現狀，「如果佢哋冇嘢落袋，都會諗點解會冇嘢，我哋仲有空間去講，仲有機會去爭取（真普選）」。
社工許麗明是佔中義工，由商討日（二）開始加入，擺過街站、走過毅行，同行義工有教師、大企業負責人和中資公司經理，「大家都有個共通點，就係好抑鬱，同身邊朋友唔傾偈，唔講呢啲嘢（政治）」。
「同路人」責罵最難捱
挺過一年多時間，近月最難捱，聲稱「同路人」的連番責罵，有左派文革式的批鬥，「其實我要求好卑微，你唔佔唔緊要，你唔好鬧已經好開心」。
她從不相信政治明星，參加佔中義工，希望建立一個由下而上的公民社會，也早知中共不好對付，「預咗冇公民提名」，但以為還有商討餘地，「人大落閘落得好死，好似直選提委會、政黨提名都係一個空間，但完全冇」。普選無望，她回想前年在政總反國教，「𠵱家可以去邊？連公民廣場都冇埋，被打壓到連個地方都入唔到去」。
許麗明說現時是「殺到埋身」的階段，正如陳健民所言，當對話走到盡頭，就要落實佔中。她在佔中時會擔任糾察，也有機會被警方拘捕，「之前商討都仲係集體運動，一班人去做，但去到呢一刻，自己真係要思考走定唔走」。她坦言還未下決定，首要考慮是工作，「但我一定會喺佔中現場」。
她明白佔中無法扭轉人大的決定，但是要告誡泛民不要轉軚，「你哋唔好亂嚟，要代表我哋去拒絕假普選」。她說佔中的得失不能計算，「我又冇仔女，爭取到普選都享受唔到，我成日同朋友講，我為咗你同你啲仔女咋」。像前人種樹，後人乘涼，「咁多年來能夠參加社運，都係之前嘅人留畀我哋。到呢一刻自己有能力、有諗法，應該攞番出嚟，一代一代留落去」。
【壹錘佔中】8月31日 5pm直播
壹錘定音: http://hammerout.hk
和平佔中: http://occupycentral.appledaily.com
YouTube: http://bit.ly/occupycentral