現年30歲的周永恒，出道至今負聞不絕，四年前跟前歌手趙頌茹（阿Yu）奉子成婚，現育有兩女。阿Yu前日報警指上周日遭周永恒打傷，有指家暴背後是感情問題，阿Yu揭丈夫偷食，小三正是周永恒模特兒公司的拍檔、現年25歲的港視小花劉依靜（Ruby）。周永恒前晚直認有婚外情，而Ruby昨封嘴避談事件。
周永恒近年演藝事業未見起色，要孭起頭家的他壓力爆煲，與趙頌茹感情轉淡。一年多前，周永恒認識模特兒劉依靜，兩人一拍即合大搞模特兒公司，不時出雙入對工作，日久生情。據知，周永恒曾因為家庭問題情緒受困擾，Ruby出言安慰，令周永恒大為感動，兩人關係變得曖昧。近日阿Yu發現老公出軌，大興問罪之師，至上周日，阿Yu隨周永恒返奶奶寓所吃飯，夫妻發生爭拗，阿Yu一怒之下衝出家門，周永恒追出電梯大堂，推了老婆一下，令她跌倒下巴受傷。事後阿Yu到屯門醫院驗傷，返家沖涼後便離家出走，至前日報案，警方調查後即落案起訴周永恒，他本周五要往屯門裁判法院提堂。
Ruby要時間冷靜
周永恒和阿Yu間的第三者Ruby曝光，記者昨在尖沙嘴發現她獨自返公司取文件，然後再到櫃員機入票，她全程不停講電話，素顏的她臉容憔悴。有指她介入周永恒和阿Yu婚姻，記者昨日致電Ruby，她避談：「完全唔答啦，希望你哋明白。」可會影響她跟周永恒日後工作關係？Ruby說：「未知之數。」隨即掛線。Ruby事後再短訊回覆：「對於會唔會影響公司日後運作，不嬲公事同私事都分開，不過相信現階段需要時間冷靜，希望大家畀啲空間佢哋啦。」
阿Yu撇下兩女出走，周永恒安排母親到天水圍翠湖居寓所照顧兩女。昨午1時許，他帶着將4歲長女周信希到附近商場買東西，兩父女還買零食。周永恒全程保護囡囡，怕追訪的記者把囡囡嚇親，他說：「嚟緊會上court，我做錯嘢，我會承擔。」問他可有向小朋友解釋事件？他說：「我想擺低個女返屋企先，唔好嚇親佢。」隨後周永恒再獨自落樓往跑步，他接受記者訪問：「希望你哋畀啲空間我哋。」囡囡可知家中出問題？他說：「我有同佢講乜事，我個女乜都知。我講過呢件事最影響我啲小朋友，小朋友唔識面對咁多鏡頭，呢啲係大人事，𠵱家最重要係先照顧好兩個女。我知你哋有好多問題，呢啲係我同我女人之間嘅問題，我女人𠵱家走咗，我都好想佢返嚟，希望畀啲空間我哋去沉澱吓我哋嘅感覺，多謝你哋關心。」
「我好愛太太」
周永恒昨在facebook分享自己歌曲《放下的石頭》，並留言：「這歌……代我心發聲。」而記者昨致電阿Yu，直至截稿前，她未有回覆。
周永恒被爆家暴後，前晚接受記者電話訪問，提到他有小三，他直認不諱：「係，係朋友講畀阿Yu聽。」訪問中他更哭說：「我好愛太太！我的確做錯，郁手推佢，令佢下巴損咗。好想佢原諒，同埋神原諒我。我唔見咗老婆五日，第一日覺得好煩，第二日開始悔改，因為兩個女好重要。」他續說：「啱啱喺差館簽擔保，我知自己做錯，太太報警告我，我好唔開心。我呢幾日喊到唔識喊，冇眼淚，好想搵番太太，好想有完整屋企。我好失落，呢段時間好想同爸爸媽媽兩個女靜落嚟，諗吓以後方向。好想挽留同太太關係。有日同大女去街，佢話媽咪好辛苦，問我點解打媽咪，搞到媽咪下巴損咗。叫我同媽咪講對不起，我當下即刻攬住個女喊。」
採訪：楊定、皓騫
攝影：陳辰、陳俊強、朱志聰
【壹錘佔中】8月31日 5pm直播
壹錘定音: http://hammerout.hk
和平佔中: http://occupycentral.appledaily.com
YouTube: http://bit.ly/occupycentral