今屆美網雖然冇咗因傷缺戰嘅李娜，但一樣有中國球手喺女單有好表現。彭帥次圈贏咗4號種籽拉雲絲卡後，上周五第3圈乘勢再贏一個種籽球手，以盤數2:0擊敗28號種籽雲絲，躋身16強。不過佢就證實將同女雙拍檔謝淑薇「分手」。（now676台今日11:45pm起直播）
晉16強平最佳成績
彭帥曾經喺2011年打入美網16強，呢個階段亦係佢歷來參加4大滿貫嘅最佳成績。今場波彭帥對住雲絲，開賽初段雙方都保住發球局，到第8局終於成功破發；到第2盤情況都近似，去到後半段把握一次破發，最終以6:4、6:3淘汰對手。彭帥將喺16強面對14號種籽捷克嘅莎花露娃。
彭帥單打成績一般，但雙打就威盡，𠵱家仲係世界排名第1，不過佢賽後證實，今屆美網係佢最後一次同謝淑薇合作：「呢個唔係倉促嘅決定，係經過大家商量之後嘅結果。至於原因係一定有，但我覺得冇必要公開出嚟。」有台灣傳媒就指出，彭帥不滿謝淑薇經常唔能夠訓練，加上狀態下跌喎。
同日女單賽事，舒拉寶娃輕鬆擊敗列絲姬。男單方面，費達拿喺次圈直落3盤輕取澳洲嘅哥夫。對手發球出名勁，不過費天王冇有怕，有一球哥夫發球時速達229公里，但佢一樣回到兼攞分，認真犀利。
識睇，一定係睇足英台【英波Live】：
http://soccer.appledaily.com
http://bit.ly/engballlive