睇網上朋友時不時cap新聞報道入面，阿老馮話「曼聯又輸一場」嘅畫面時，其實笑唔出。因為諗起家陣睇香港嘅新聞報道，何嘗唔係日日都講緊呢個小城不斷輸波嘅消息吖。其實睇睇吓，大家同是天涯淪落人，好多共同點，幾有親切感！
自大自卑：唔使多講，曼聯同香港都咁威……以前！大家嘅威水史都足夠起好幾個博物館，而同道中人嘅口頭禪都係「舊時乜舊時物」。但冇乜信心時就會胡思亂想，一場都未贏就幻想自己可以連勝7場，輸一場又會即刻攞番前度張相嚟緬懷傷感一番，呢種多愁善感情緒化嘅性格，據講好適合寫小說，書名提議係《夢一場》！
左派抬頭：曼聯兩個新加盟球員都係左腳球員，馬高斯盧祖加迪馬利亞，一前一後，同聲同鄉，反守為攻又得，連消帶打亦掂。
周街敵人：曼聯迷以前順風順水時個頭抬得高咗啲，唔小心得罪晒啲競爭對手；本住「敵人嘅敵人係朋友」嘅原則，又激發咗一班班反對黨。冇對過身份證，但我懷疑反曼嘅人頭數目分分鐘多過支持曼聯嘅，同香港反佔中有異曲同工之妙。
勁人當草：拿尼難捨，再見香川，小豆拜拜，sayo沙夏。邊個勁邊個屎，邊個係草邊個當寶，其實睇話事人係邊個，一朝天子一朝臣啫。選賢讓能？係上世紀先有嘅美德。
專家多多：亂世英雄多，江湖術士亦唔少，香港問題專家近年湧現之際，曼聯問題專家亦「乸埋」好多。通常都係曾經滄海但家陣冇乜關係，或者係仲未趁火打到劫嘅過來人，佢哋最勇於發言指指點點，務求「趁你病出吓名」！
隔籬飯香：家陣香港人最好搵嘅返大陸，最好住嘅去台灣，最好玩嘅去南韓，好嘢都喺隔籬屋。正如曼聯發現呢幾屆跌咗嘅獎盃都喺曼城嗰邊搵番，咁搬唔搬埋過去呢？有排諗。
我話似啫，但波嘅嘢可以期望明天會更好；香港究竟仲有冇未來都未知。做曼聯迷，應該樂觀過做香港人！
KEYMAN
節目主持
mailto:[email protected]