子曰：「三十而立」，前日才34歲生日，但謝霆鋒的行為舉止已到「四十不惑」境界，行先別人差不多十年。15歲憑星二代身份入行，早已經歷別人未有過的遭遇，撞車、頂包、收監、結婚生子到成為香港金像獎影帝，一切都像催生劑令人加速成長。早前接拍電影《一生一世》跟高圓圓談情說愛，自言首嘗拍愛情片的霆鋒，直言演回有衝動的年輕人非常有難度。
撰文：藍文浩
霆鋒手上的可樂和人字拖依然故我，永遠不忘chok儼如代言人。《一生一世》當中飾演默默守候高圓圓身後的角色，情深款款處仍有一股不chok不快的潛力，但就隱藏得較過往嚴密，極力壓抑自己的感情，他說：「我又冇喎，反而有人覺得套片比較淡靜，不過導演鄒佡話《摘星奇緣》（Notting Hill）都係淡，一樣唔會大起大落。計落呢套係我第一套純愛情電影。」談情難，代入時代背景更難：「第一最難嘅係喺國內長大嘅過程，第二就係成部電影橫跨咗幾十年，由80年代一直做到00年代，𠵱家要演番小朋友個感覺好難，咁純真咁冇過濾，呢種純樸係好難。」他補充說：「尤其十幾歲比較衝動，所有嘢都係直腸直肚，最難係呢度。」成長的經歷的確會令人變得世故複雜。
遠距離祝福栢芝
戲中霆鋒的角色為救高圓圓而坐監，卻不讓女方知道，霆鋒自言跟自己想法接近，他說：「某程度我都會咁做，我係信一生一世嘅人。細個時候嘅一生一世，覺得係要拖住手、攬住。𠵱家嘅一生一世，可以係比較離遠嘅祝福同支持，當然最好都係攬住啦。」前妻張栢芝經常帶同一對囝囝到處飛，是否因而認為離遠祝福才是維繫目前關係的最好方法？他言簡意賅地說：「唔關事，我諗只係年紀嘅問題啫。」霆鋒知道女主角敲定為高圓圓後，就確定接拍《一生一世》，他說：「我唔覺得咁易會再遇到一個好對手，當時連劇本都未睇，就係覺得呢兩個人係可以相信先接。我好驚嗰啲一睇男、女主角就覺得冇可能，咁演戲好事倍功半。」片中感情淡，親熱戲一樣淡，但霆鋒的六塊腹肌一出場保證令女性觀眾尖叫：「喺北京嘅冬天拍學校嘅一場（親熱戲），我為呢場戲減咗十幾磅，一日真係只食一排朱古力，凍到長期打冷震，好虛弱。」一部愛情片已令他精神透支，更沉重的題材又如何取捨？他說：「我相信除非類似《劫後重生》（Cast Away），一個排球就可以拍晒，或者《I'm Legend》（魔間傳奇）呢啲咁個人嘅戲，如果唔係其實劇本係死嘅，人都係生嘅。」
場地：GrowthRing & Supply
【壹錘佔中】8月31日 5pm直播
壹錘定音: http://hammerout.hk
和平佔中: http://occupycentral.appledaily.com
YouTube: http://bit.ly/occupycentral