基斯坦奴朗拿度（C朗）雖然啱啱攞咗歐洲足協最佳球員，但可能因為傷勢未好番，又啱啱先踢咗一兩場波，葡萄牙教練保羅賓度睇嚟都十分體貼，新一輪點兵冇揀佢，而皇家馬德里亦唔會帶佢隨隊踢周日對皇家蘇斯達場西甲。
保羅賓度：C朗缺態
葡萄牙公佈咗下周三歐國盃外圍賽主場迎戰阿爾巴尼亞嘅大軍名單，我求大俠起初都以為自己睇漏眼，有比比和摩天奴，連認低威返母會士砵亭搵食嘅拿尼都有，唯獨唔見C朗嘅？原來保羅賓度真係冇揀佢，佢就同傳媒解釋話C朗缺態，決定今次唔召佢。雖然上場西甲開鑼戰，C朗踢足全場兼有波入，但狀態真係唔算好「弗」，同佢踢完世盃有傷在身應有關，而皇馬亦冇預C朗喺嚟緊對皇蘇場西甲上陣，教練安察洛堤話佢左膝跟腱有傷，趁呢段時間休養吓。
我求大俠就覺得冇咗C朗，葡萄牙得番班「豬隊友」，下周三真係未必食硬阿爾巴尼亞㗎，尤其佢哋過往踢外圍賽都成日燒鬚，好似上屆世界盃外圍賽主場對住北愛爾蘭都要失分，心水清嘅球迷，你哋知道點買啦！
識睇，一定係睇足英台【英波Live】：
http://soccer.appledaily.com
http://bit.ly/engballlive