時間過得好快，暑假近尾聲之際，歐洲各地聯賽都展開晒，話題日日都有，為爭成績，各隊諗方法增兵，順頭順路嘅就話買就買，如果唔係，做領隊有時都要諗諗計，等班球會高層見到問題所在；又或者兵行險着，開季輸、和一兩場等班老細急吓，咁就要咩都得啦。
太子變波壇落腳地
𠵱啲現象喺英超同西甲就好常見，呢方面荷蘭同德甲比較少出現，亦可能係傳統部署嘅習慣，好似荷甲咁經常一開波就去盡，由於打法傳統都重於進攻，所以入球亦較多。今日想大家留意吓星期日12嗰場燕豪芬（圖）對維迪斯開「入球大細」3.5球，「大」有2.07倍，唔錯，我哋成日都話，睇波最緊要有波入，話知佢邊隊輸贏呀！
自從快活谷轉咗去九龍操，公民又唔打港超聯，所以臨近開季跑馬地球場都冷清清。其實呢個現象呢幾年都係咁，以往球壇茶座俾班打波人仔嘅落腳地方都有所改變，唔講大家可能都真係唔知，好多球員，無論人鬼呢幾年多咗喺太子出入，因為師父仔間跌打醫館喺呢度，有咩大小損傷都會先去俾師傅摸吓至安心。
早幾日我去醫館找數就撞到東歐仔，見佢比師傅得閒，就去對面間醒目仔茶檔吹吓水，問佢：「今年轉咗方向隊好似開心好多，人工加好多咩？」佢話：「領隊，錢多咗當然好，最重要我唔使住劏房，仲唔使一年搬3次劏房，就梗開心啦！」我碌大對眼心諗，咁都得？
本地職業領隊
耳聽八方 專收好料
識睇，一定係睇足英台【英波Live】：
http://soccer.appledaily.com
http://bit.ly/engballlive