港隊喺南京青奧掃走2金4銀1銅，但最搶鏡嘅唔係奪金小將，而係「擄走」運動員合照嘅港協義務秘書長彭冲。噚日代表團一行30幾人凱旋，彭冲影完大合照就速逃，反而「當事人」吳芷柔就好大方咁講番當日有幾「O嘴」。
事緣港羽小將吳芷柔喺混雙奪金，賽後接受電視台訪問時突然俾彭冲拉走，要佢同霍啟剛等高層合照。港協事後發聲明話係一場誤會，彭冲噚日同代表團返港就梗係低調行事啦，連大合照時都匿喺後排；當記者訪問完芷柔，佢已經冇咗影。
反而當日一臉錯愕嘅芷柔，就好大方咁講番「成名」感受：「我喺南京開fb時，都知道件事喺網上流傳，當時（被拉走）真係有啲驚訝，始終未遇過咁嘅情況。」下周一開學就升讀協恩中五嘅芷柔除咗打學界賽，10月仲會出戰亞青賽，佢話希望可以延續強勢，喺女單同女雙都打入4強。
至於奪得兩銀嘅「小美人魚」何詩蓓，聽日就會轉戰維園舉行嘅香港國際游泳錦標賽，下月會出戰亞運嘅佢話今次見識到中國泳手嘅實力，對自己好有啟發。
識睇，一定係睇足英台【英波Live】：
http://soccer.appledaily.com
http://bit.ly/engballlive