隔牆有耳:約友嘆啡密密斟 李國能憂國憂民 - 李八方

隔牆有耳:約友嘆啡密密斟 
李國能憂國憂民 - 李八方

北京一股白皮書寒風,話法官係治港者,又要佢哋愛國愛港,好彩有班法律群英敢上街遊行頂住,當然仲有前終審法院首席大法官李國能,敢公開撰文反駁,據聞唔少本地左派都睇李官篇文唔順眼,但又唔敢向佢老人家開火,始終佢喺法律界德高望重。李官寫完文後就唔見佢現身,八方噚日咁啱撞到李官忙裏偷閒,同佢好友資深大律師陳志海邊飲咖啡邊傾偈,陳狀同八方話,李官仲係好憂國憂民!
八方噚日喺和記大廈食完飯,喺地下間Pacific Coffee見到李官同陳大狀飲咖啡,兩人大大話話傾咗大半個鐘,八方亦唔好意思打擾佢哋。

心水清字字珠璣

等到李官準備走嘅時候,八方冒昧上前打招呼,李官亦好客氣咁同八方say hi,八方打蛇隨棍上問佢點睇全國人大常委會法工委主任張榮順話,用普通法規限《基本法》、排斥同削弱中央管治權係不被允許嘅言論,衰在八方一時口快,將張榮順講錯做清華大學法律學院教授王振民,李官心水清,立即糾正八方,話係張榮順先啱!
呢個時候佢老友陳狀插口話,其實李官好憂國憂民㗎﹗咁八方又問李官,佢對王振民嘅言論又點睇?李官只係話王振民都承認,白皮書英文版將「治港」繙譯為「administrate」係錯啦!表面好似冇答,但實際李官已講咗佢嘅態度,果然字字珠璣。

李八方
mailto:[email protected]

【壹錘佔中】8月31日 5pm直播
壹錘定音: http://hammerout.hk
和平佔中: http://occupycentral.appledaily.com
YouTube: http://bit.ly/occupycentral