英超踢咗兩輪，最令人驚喜嘅，當然係曼聯啦！大家都以為雲高爾會好過莫耶斯，點知……，睇嚟今季嘅分別都唔會太大，因為球隊有3個缺點（唔係跑得慢、冇速度同唔夠快！）。
缺點1：尹佩斯無狀態
紅魔鬼雖然擁有好多進攻球員，但呢兩季多數都係要靠射手尹佩斯入波。不過，呢位重心球員經常養傷，令曼聯嘅入球數字變得唔穩定。雖然「天使」迪馬利亞啱啱入魔，但係佢唔係C朗，唔可能一季入30球。當諗到迪馬利亞嘅傳中波，只能交畀韋碧克、朗尼接應，我就覺得英雄無用武之地啦！
缺點2：防守有等於冇
比起防守，進攻問題只係小巫見大巫！因為曼聯𠵱家嗰幾位中堅，都係麻麻哋！對住英甲嘅米爾頓凱恩斯都被大炒4球，睇得出曼聯後防真係好「性感」。無疑曼聯已經買咗阿根廷國腳馬高斯盧祖，不過暫時又睇唔出雲高爾可以搵到邊位好中堅，同呢個新兵夾檔，所以佢哋嘅後防依然信唔過！
缺點3：心理質素超差
以前曼聯球員出名心理質素強，𠵱家呢代就差啲啦！落後嘅時候，球隊表現毫無拼勁，仲越踢越慌、越踢越亂。正如賤輝講：「你行得上台，就唔好怯，怯，你就輸成世！」𠵱家呢班曼聯球員除咗朗尼同桑馬達之外，其他紅魔兵落到場都踢得患得患失，咁你話唔輸就出奇啦！
不過，曼聯今個星期六對般尼呢支聯賽兩連敗兼失4球嘅升班馬，睇嚟都可以贏番止止血，大勝就應該唔會發生，我估曼聯小勝2:1啦！
LULU
不懂踢波愛睇波