恒指連續幾日力守25000大關，終在結算日冧棚，大市proxy港交所（388）越跌越有，50日線處於164元，剛好是6月升浪以來調整一半嘅水平，一於繼續守候。另一龍頭騰訊（700）亦呈圓頂派發迹象，阿里巴巴超靚業績竟然零刺激作用，不排除有基金沽騰訊套現換馬阿里，後者9月16日正式掛牌前，騰訊沽壓隨時不減反增。
克莉絲汀疑似賣盤
龍頭股腳軟，業績股表現天與地。安東油田（3337）盈利喪跌83%，股價插水15%，但現價年度化市盈率竟達百倍，加上冇實質資產支持（PB 2.5倍），跌浪已成，切勿胡亂接刀。早排推介嘅績優股滙銀家電（1280），噚日再炒高14%，創逾兩年收市新高。買盤洶湧而至，撈貨價要上調至0.6元樓下，或留意facebook更新。
放榜高峯期，披露易九成九通告都係業績，好嘢隨時走漏眼。專營麵包及蛋糕等嘅克莉絲汀（1210），噚日靜俏俏出咗個含金量極高嘅通告。公司宣佈，第二大股東丸紅株式會社將悉售所持12.03%股權予獨立第三者林煜，未有披露作價。睇返公司業績，上市後明顯走樣，去年全年蝕近半億元，今年中期未有好轉迹象，共蝕8,034萬銀，人工原料雙高成為致命傷，經營如此困難，賣盤可能性不低。事實上，公司市值5億銀，剛好等於殼價，但每股NAV高達0.99元，叫價能力高，第二大股東出貨隨時係伏線，現時貼近上市新低，屬刀仔鋸大樹佳品。
唐牛
https://www.facebook.com/tongcow88