香港樓市大約每五年為一個周期，因過度借貸，1963年樓市見頂，1965年廣東信託銀行等細行擠提，爆發股災，1967年暴動，股樓跌到1969年見底。混亂期華資地產大發圍，長實（001）、新地（016）、合和（054）、恒隆（010）、大昌（088）地產五虎上晒市，樓市升到1974年石油危機見頂回落兩年；1976年政府起地鐵、搞居屋，樓市升到1981年，同年中英談判，中國要收回香港，出現股災及移民潮，樓市跌到1984年《中英聯合聲明》後見底，聲明訂明50年不變，按揭由15年加長至30年，樓市升到1989年見頂。
90年代係香港人嘅股樓狂潮，由1990年升到1994年才回調一年，然後就爆升到1997金融風暴，係唯一一次只有兩年嘅升市。1997年尾插到2003年，再升到2008年金融海嘯。可見香港樓市有五年周期特徵，尤其升市多為五年，跌市則或短過五年。呢浪由2009年至今，亦已經五年。政府用鎖盤方法防止爆煲，卻衍生無盤下嘅亢奮。無論周期、市場氣氛、價格升幅都顯示樓市處頂部水平，明年美國加息，會否再一次重演美元萬劍歸宗嘅金融殺戮？
Mr. Tregunter
註：作者為《地利根德閣》blogger，著作有《樓市撈底攻略》
本欄逢周五刊出