周秀娜昨日與蕭定一在尖沙嘴出席手機App活動，她今年11月會跟張智霖合拍電影《千億惡魔愛上我》，電影還會變成手機遊戲，身為女主角的娜姐昨日大露背造勢。自去年宣佈跟拍拖6年髮型師男友陳偉成（Avis）分手後，娜姐感情一直交白卷，反而舊愛卻火速跟F奶𡃁模尹蓁晞（Yumi）撻着，兩周前兩人才慶祝拍拖一周年，Yumi又在Instagram大晒Avis送的大束鮮花，但前日她卻突然自爆回復單身。娜姐昨懶理Avis俾女撇，也不願送祝福，Avis昨解釋跟Yumi只是耍花槍。
對於Avis跟Yumi閃分，導火線是Avis誤會女友有韓國男模小三，娜姐說：「我唔知呀，冇乜留意，分開咗都冇聯絡。」Yumi揶揄Avis是無內涵的男人，娜姐馬上劃清界線：「呢啲係兩個人感情事，我完全係外人。」以前拍拖可覺Avis沒內涵？娜姐說：「咁我覺得大家都會成長，真係唔關我事。」她語畢即大笑。
「幾享受單身」
提到Yumi指不想給Avis博宣傳，娜姐說：「我唔係當局人，知嘅嘢都係你哋報道，我只係想講一句，君子絕交不惡於聲。」可覺他們閃分很可惜，娜姐說：「冇乜感覺，我會祝福大家，係我都祝福自己先，𠵱家幾享受單身。」她沒想過要翻撻，再揀男友必要成熟型。
Avis昨知衰認呷醋激嬲Yumi，他在電話中說：「都怪我太緊張，我哋嗌交箒，未咁快分手，佢咁啱又去咗馬尼拉做嘢，等佢返嚟會𠱁番佢。」問Avis有甚麼絕招箍煲？他抵死說：「唔排除我學韓文，去埋韓國整容，或者帶佢去韓國旅行。」Yumi昨短訊回覆：「要唔要復合好難答到你，我要時間再考慮。」
採訪、攝影：盧妹、陳杰
