國際武打巨星之子吸毒，引起軒然大波，從另一個角度睇，武打巨星身家豐厚，又得小名一粒仔，買埋大屋畀佢住，難免俾人話縱壞個仔，令佢走上歪路。其實𠵱家都有好多富二代搞出嘅麻煩事，怪只怪老爸太有錢。
球會領隊換人好似走馬燈，前朝遺留嘅陣容，基本上都可以當做「遺產」；雲高爾接手曼聯搞到一頭煙，多少與費Sir遺產用到盡，莫耶斯又留低水貨有關。接任熱刺嘅普捷天奴（圖）就認真執到寶，前朝波亞斯將賣走加里夫巴利嘅轉會費，使凸收購球員，被笑為水貨嘅拉美拿同查迪尼，新一季都有明顯改善。
波仔極速被炒，由舒活接手，呢位青年軍教頭又打起一班後生仔，好似哈利卡尼、賓達納等。普捷天奴一接手，基本上唔使擴軍已經夠踢，佢只需改善上季熱刺一啲戰術問題，好似單箭頭同中場配合等等，已經足夠成為英超中上游球隊，難得熱刺一向使慣，再畀子彈等普帥擴軍，結果佢再喺中堅、右閘個別位置增加賓戴維斯同艾歷迪亞。
其實熱刺已經擁有足以參戰歐聯嘅陣容，而且唔係英格蘭人，亦都冇起用英格蘭兵嘅包袱，艾朗連儂、安祖斯唐辛等英格蘭兵已失勢，但只要有成績，熱刺球迷又點會介意，作為阿仙奴球迷嘅我，爭前4，驚熱刺肯定多過佢哋周日對手利物浦。文：牽牛