喺香港開業40年、係唔少政商界名人開餐勝地嘅樂意餐廳Louis Steak House，噚晚舉行周年慶祝晚會，請嚟美國駐港總領事夏千福以及天主教香港教區樞機主教湯漢做主禮嘉賓。
久未露面嘅千福BB致辭時，特別用廣東話向出席嘉賓問好，認真識做；隨後都係用番英文，讚揚楊氏兄弟40年前經營樂意餐廳至今，非常難得。
店名靈感源自聖類斯
湯漢則話喎，多年前已認識佢哋嘅父親，並曾替楊氏兄弟主持婚禮，所以都算同佢哋家族有深厚感情。但做咗主教後，因為太忙，少咗去樂意幫襯咯。原來樂意餐廳取名Louis，同楊家大哥曾喺慈幼會聖類斯小學、即St. Louis School（Primary Section）讀書有關。
其他到場到賀嘅嘉賓，都係多年熟客，包括立法會保險界議員陳健波以及食家劉健威等。
經理楊大陸表示，樂意未受惠內地自由行，主要靠本地及外國熟客仔捧塲，而位於灣仔的店舖，創業至今租金升咗5倍，但幸好物業屬馬來西亞政府擁有，非一般商業集團，否則難以生存。