係人都知俾美軍殺死嘅拉登係阿仙奴嘅粉絲，而曼聯亦有個好知名人物鍾意佢哋，佢就係貌似漫畫《龍珠》人物魔人布歐嘅北韓領導人金正恩。聽聞金正恩直頭下令要播曼聯啲比賽，等北韓啲人民可以同佢一齊認識呢支英超班霸，不過紅魔季初表現咁差，唔知佢會唔會粉飾太平，搵啲舊片當新片播呢？
國家電視台非法途徑播波
北韓對傳媒向來有非常嚴格嘅規定，只有極少數人可以上網、睇電視同埋聽收音機。不過，曼聯就為北韓人民帶來前所未有嘅改變。英國《鏡報》同《曼徹斯特晚報》日前爆料，話北韓領導人金正恩好鍾意體育，而且特別鍾意足球。
佢除咗支持德甲之外，同時亦係曼聯嘅粉絲，仲要係超級嗰隻。英國傳媒就話佢之前就試過喺奧脫福郵購曼聯嘅商品，當中包括主場波衫。為咗確保自己睇到曼聯嘅比賽，同埋畀人民同佢一齊支持曼聯，聽聞佢就落柯打要國家電視台轉播曼聯嘅比賽。但係，據了解英超喺北韓冇合法嘅播放渠道，所以國家電視台係用非法途徑嚟播紅魔啲波。
撇開合唔合法，有人擔心曼聯今季開季開得差，周二喺英聯盃次圈作客輸俾米爾頓凱恩斯0:4，頭3場比賽1和2負，可能會搞到金正恩下令停播，費事畀國民見到佢支持嘅球隊頹嘅一面。不過，亦有指金正恩會喺曼聯成績差嘅期間，搵紅魔最威水時嘅比賽嚟播住先。講真，北韓人民唔係咁容易接收到出面世界嘅資料，鬼知啲比賽新定舊咩。
紅魔球員身價超越曼城
另外，曼聯周六會喺英超早場作客般尼，但新魔兵馬高斯盧祖可能唔可以喺金正恩面前獻技。消息指關於馬高斯盧祖嘅轉會費仲未搞清楚，所以仲未攞到工作證，如果佢喺英國時間周五中午前搞唔掂，就會連續第3場缺席紅魔嘅比賽。
識睇，一定係睇足英台【英波Live】：
http://soccer.appledaily.com
http://bit.ly/engballlive
另外，迪馬利亞以破英國球會轉會費紀錄加盟曼聯後，紅魔球員身價總值超過4億鎊（見附表），成為英超球員身價總值最高嘅球隊；緊隨其後嘅係曼城、車路士、利浦及阿仙奴。