Ice Bucket Challenge(冰桶挑戰)熱潮似乎漸漸減退,幸而呢個活動確實令到大眾對肌肉萎縮性脊髓側索硬化症(ALS)嘅認識加深不少,過去幾星期嘅淋冰活動為香港肌健協會籌得可觀善款,去到本周三,協會已經籌到1,800萬元。新鴻基地產(016)樓神雷霆噚日亦被挑機,不過佢就選擇捐錢找數。
本報專欄作家老樓噚日朝早向新地、長實(001)同埋恒地(012)三大發展商嘅樓神挑機。新地雷霆表明只會捐款,唔淋冰喇,原因係佢呢幾日忙住賣樓工作,「莫講話廿四小時,七十二小時都未必有時間找數」咁話,佢冇講捐幾多錢,但貴為千萬年薪高層,斷估唔會捐得少啩。恒地韓家輝預告兩樣都會找數,長實趙國雄就未有表示嘞。