俊知（1300）啱啱公佈半年度業績靚仔，嚟緊幾年，4G網絡鋪設高峯期，已經掂過碌蔗。
泊住海爾大碼頭
又俊知同海爾搞基金，擺明戰鬥格，買俊知，同佢一齊博食大茶飯。
俊知最新半年純利，表面倒退6%，但唔計認股權公平值呢項非經營性收益減值，實際增長23%，至2.02億銀人仔，好靚仔。
又場內擔心，祖國三大電信龍頭中國電信（728）、聯通（762）同中移動（941），共用基站鐵塔，可能影響到包括好似俊知呢類電信網絡配套商。但俊知講明，由於三位大哥大喺2G、3G同4G網絡，係用唔同頻率，所以共用鐵塔，唔會影響到集團射頻同軸電纜需求。反而，因為三大電信商共用鐵塔，縮減基站選址困難，就會加快網絡建設進度，對俊知產品需求，會keep住強勁增長，而高峯期會喺2016年出現。
唔好估多，俊知今、明年度，EPS增長22%咁大把，至0.478和0.58元，明年PE得番3.6倍，派息6.5厘，已經吸引到痹。
俊知上星期三公佈，同海爾、金湖投資管理，訂立戰略合作協議，成立同管理一間基金管理公司，主打中、韓新經濟領域。
睇到俊知諗多步，比行家行快一步，唔係區區齋做網絡基建配套業務，拍住大孖沙海爾，務求新瓣數帶嚟新增長點，股價快高長大，大小股東，齊齊有運行。
俊知上年10月配股，股價之後大橫行近一年，有揸唔穩嘅，要沽貨，都應該沽得七七八八，俊知係等爆。第一站先睇俊知引入海爾所發認購權證行使價3.15元，現價（2.12元）要翻近半番，明年PE先得5.4倍。
錢雋
細價股專家
本欄逢周二、三、五刊出