一套戲，主角數量唔可以太多，否則個個大佬爭戲份，結果就係鬧不和，每個角色冇重點，最後變咗套星光熠熠嘅爛片。足球同電影一樣，一套戲嘅時間有限，正如比賽中波都係得一個，太多大佬級球員，只會分工不清。
車路士上季中場就係爭個主角，林柏特後生嗰陣係主角，但老咗只能做甘草，就似羅樂林咁。原本摩連奴（圖）想捧奧斯卡杜斯山度士上位，但又捧唔起，至於拉美利斯同尼曼查馬迪呢啲一睇就知係車仔版嘅陳國邦同麥包，做配角一流，擔正都係唔夠人氣。摩連奴都知自己台戲爭個主角，今季請咗喺巴塞做咗幾年配角嘅法比加斯返嚟，畀個主角法比仔做。法比仔向來都係主角材料，但前幾年去咗巴塞拍住班影帝級人馬，自然降格做配角啦，但佢今季嚟到車仔，自自然然做番中場核心。有咗法比仔呢個主角，車仔今季條中場醒神晒！加埋摩連奴都識安排「戲份」，指明法比仔做主，而奧斯卡就做個勤力嘅配角，負責周圍走，而馬迪就係主角身後嘅男人。分工咁清晰，各司其職，車仔呢套戲當然有質素啦。
反面教材就係曼聯，陣容不平衡，前場有朗尼、尹佩斯、桑馬達同迪馬利亞4大男主角，但冇配角；反而，後場送走晒艾拉、尼曼查維迪等，靠菲爾鍾斯、基斯史摩寧以及米高堅尼呢班新仔擔正。前場有主角冇配角，後場冇主角得班新人，爛片難免。文：咖喱