歐美經濟強弱懸殊，貨幣政策走向各走極端，這邊廂部署加息，那邊廂卻醞釀放水，吸引資金追捧美元資產，美股兩周前出現較像樣的調整，點知話咁快又連環破頂。標普500連2000點亦破埋，寫下新一頁。連隨炒新產品概念嘅蘋果得寵，阿里巴巴又上市在即，彷彿好戲在後頭。姑勿論個升市仲有幾耐玩，一直企硬嘅淡友，一如租樓等冧市嘅本地無殼蝸牛，賠了夫人又折兵。
事實上，市場對儲局明年加息早有共識，所以即使耶倫為首嘅儲局近排露少少鷹相，投資者亦冷靜對待，況且歐洲經濟唔係好得，央行行長德拉吉推QE嘅立場清晰咗，反而成為近日大市上升催化劑。
從央行政策角度，9月都會有份量，事關歐央行和聯儲局將分別於4日同17日議息，尤其是德法兩大龍頭嘅失業數據都遜預期，後者嘅失業人口更創新高，而德國消費信心20個月首次下跌，早前喺Jackson Hole暗示有需要就再出招嘅歐央行行長德拉吉，下周四點解畫，自然惹人關注。當然，央行6月減息效用未完全浮現，而新一輪銀行放水行動亦未開波，本月出新招機會微。但歐洲經濟上季已經零增長，加上區內通縮威脅有增無減，而且歐洲央行前日已委任貝萊德（BlackRock）做顧問，為其購買資產計劃出謀獻策，歐洲距離量寬的日子還會遠嗎？
至於聯儲局，耶倫上周喺Jackson Hole嘅言論半鷹半鴿，但下次議息將會是儲局10月結束買債前，耶倫最後一次接受傳媒提問的機會，按道理應該會就息口問題有新料爆。
紐元再跌空間有限
本周滙市方面，美滙指數連升六周後，本周初更上層樓，曾升至82.69嘅近一年高位，歐元連1.32算亦失守，低見1.3153美元；英鎊相對硬淨，昨日處1.66美元邊，同上周相若。日本央行行長黑田東彥指日圓幣值仍過高，加上美日息差擴大，美元曾升至7個月高位，高見104.43。
新西蘭上月出口一年來首次下跌，拖累貿赤按月增逾四成，當中對華出口銳減5.1%，對澳洲的跌幅更多達7.1%，拖累紐元周三再創半年低位，見83.15美仙。尤幸該國的乳製品出口商恒天然入股內地同業貝因美，有助鞏固中國生意，為紐元帶來少許支持，昨曾上返84美仙，短期再跌空間有限，始終該國官方利率高達3.5厘，擁高息優勢。
另一隻商品貨幣加元，禮拜二跌至1.0999兌1美元掉頭反彈，部份原因與股神畢菲特有關，因為巴郡出資30億美元，撮成Burger King與加拿大同業Tim Hortons嘅近900億港元合併方案，市場炒作單刁將會帶動加元需求，令美元兌1.1加元擦身而過。
奇兵
本欄逢周五刊登