余文樂是香港演藝界中公認的籃球發燒友，早前香港殘奧會副會長劉德華便邀請了樂仔與香港輪椅籃球代表隊的成員鍾卓庭打了一場友誼賽並拍攝宣傳短片。首次坐上輪椅打籃球的樂仔雖然處處被卓庭所制，但依然與對方交流得非常開心，自言好勝不服輸的樂仔最終不斷努力，終成功在輪椅上投進數球，二人亦惺惺相惜。樂仔坦言很欣賞及尊重殘障運動員的堅毅意志，尤其是他們不會看不起自己，反而是默默的付出努力，終有被認同的一天。
撰文：文國駿
余文樂日前到藍田一所學校與香港輪椅籃球代表隊的成員鍾卓庭交流並拍攝宣傳短片，希望令香港市民對殘障運動員有更多認識及支持。身為香港殘奧會副會長的劉德華雖然未能親身到場探班，但仍有致電給樂仔感謝對方幫手拍攝，樂仔亦於電話中向華仔表示：「唔好咁講，件事好有意義，係應該做嘅。」
被對方「讓番轉頭」
與卓庭打完友誼賽後，樂仔坦言：「純用上身去控制，其實好困難。同平時打籃球係唔同嘅辛苦，上身肌肉要好強，全靠上身支撐。」談到參與今次拍攝，他謂：「華哥係香港殘奧副會長，希望可以推廣多啲傷殘運動，華哥知我打開籃球，咁就一拍即合，諗都唔使諗就答應咗，我平時喺籃球方面都有推廣。輪椅籃球好少睇到，佢哋好犀利，傷殘運動員鬥志要比一般運動員強，因為佢哋行動已經困難，仲要喺困難基礎上進行，其實好值得去鼓勵，尊敬佢哋。」樂仔笑言剛才跟卓庭比賽時第一次有被對方「讓番轉頭」那種感覺：「卓庭畀我感覺好正面，好熱血，佢有籃球呢樣寄託去奮鬥，其實同正常人一樣，冇分別，希望多啲輪椅籃球嘅報道，畀多啲人知道呢種咁熱血嘅運動。」
入行首年想解約
樂仔特別欣賞卓庭沒有因意外而看不起自己：「我知道卓庭08年車禍出事之後行唔到路，開始投入輪椅籃球運動。佢好有信心好正面，冇因自己遭遇睇唔起自己，好多人會失去信心，但佢冇。睇佢點去迎接新生命，將弱項變強項，好值得尊敬。任何人點睇你都係假，自己點睇先係最緊要。有好多年輕人未讀完書或者剛讀完書，少少挫折就話要放棄或者覺得呢個世界好難，人哋遭遇比你更困難，點解人哋可以做自己proud of、有意義嘅嘢呢？呢啲全部都係睇你自己嘅選擇。年輕人最緊要有鬥心，乜都可以冇但鬥心唔可以冇。講家庭有冇錢呀或者際遇係多餘，自己要有鬥心，我自己鬥心都係強。」
問到樂仔人生是否有想放棄的時候？他不諱言第一年入娛樂圈已想放棄：「我覺得唔係好適合，已經想解約唔做，我唔係一心入呢一行，一開始唔係好適應。公司同我講我可以唔做，但唔係呢個時間，呢個時間你選擇唔做，以後做乜都唔會成功，你可以喺成功時先唔做，但唔係𠵱家囉，咁一留就留咗十幾年。哈哈！」
鍾卓庭練波開竅
鍾卓庭於08年時因交通意外而截肢，他沒有自暴自棄，反而更積極去面對新的人生，參與輪椅籃球活動，身形高大的他是隊中的中鋒，他說：「10年首次代表香港喺廣州參加亞殘運，係夢寐以求嘅事，但呢個夢好快就被打破。『包尾』成績令我哋醒覺，我哋要改變。」
為應付10月在韓國舉行的「仁川2014亞洲殘疾人運動會」，去年中他們便開始苦練，輪椅籃球對球員體能要求相當高，技術亦非一朝一夕可以練到。卓庭又表示輪椅籃球為他帶來的轉變：「呢個係團體運動，每一個球員都有自己崗位同埋責任。以前我好少講嘢，但玩咗輪椅籃球後，要同隊友溝通，講嘢都多咗，係一個好好嘅改變。」
