官恩娜（Ella）似乎命中注定會遇上好多光怪陸離嘅事，記得2006年Ella喺屯門黃金海岸俾男觀眾台上狼吻，嚇到魂飛魄散，前晚佢喺中環出席馬來西亞女歌手李佳薇嘅新歌分享會，話香港好多人有精神問題，要聽吓李佳薇嘅抒情歌放鬆下，然後就爆佢喺日前遇到一個疑有精神問題嘅女人，被佢半途攔截，打到佢連手機都飛咗落地。
邊驚邊錄影
Ella口震震講番當時情況：「我噚日係街度撞到個有精神病嘅人襲擊我，佢無端端擋住我唔畀我行，咁我冇理佢喇！我就攞住手機睇吓自己將會去嘅地址喺邊度喇！佢無端端又影我相，我咪問佢：『喂！你做咩？做咩影我相？』佢就一手打落我度，將我手機一拍，拍咗落地下，跟住我好驚，但係惶恐之中我都記得按錄影囉！跟住影住佢，問佢做咩，有無搞錯打人，其實我震晒，我即刻打電話畀同事，呢件事太離奇喇！」
俾人打咁係咪應該報警呢？Ella話：「我本來諗係咪要報警，但係我都係唔想件事張揚喇！我又冇受傷。不過，平時以為自己係好大膽嘅人，點知得把聲，只喺度震震震！」結果係點？Ella呆咗，現場有個街邊檔老闆娘幫手，個女人逃之夭夭喇！
撰文：馮仁昭