人材輩出嘅香港同九龍華仁書院，下月開始展開校慶活動，分別慶祝95同90周年，校友組織「華仁一家」牽頭籌辦三個大型活動籌款，目標籌6,000萬，以支持未來五年兩校繼續推行小班教學。
打頭陣係10月26號嘅校慶感恩祭同「與仁同行」校慶步行，今次會由港華行到九華，當然唔使游水橫渡維港啦，而係喺灣仔坐天星小輪過尖沙嘴。天主教香港教區主教湯漢樞機會主持感恩祭，步行禮則由69年港華畢業嘅運房局局長張炳良主禮。
明年8月紅館壓軸匯演
據知已應承出席步行嘅校友包括有線寬頻主席吳天海、電盈前副主席袁天凡等，合和主席胡應湘諗緊參唔參加。
12月6號則會喺九華搞校慶晚宴，將有100圍，可畀1,000名師生、家長、校友參加，以華仁龐大校友群，訂位真係要請早。壓軸係明年8月1號晚喺紅館舉行嘅校慶滙演，請咗港華校友李克勤同有「歌王」稱號嘅德祥地產主席張漢傑領唱，聲稱有神秘嘉賓。港華舊生、衞生防護中心前總監曾浩輝醫生噚日都有出席發佈會，佢話𠵱家好享受退休生活。會炒吓股嘅佢話，要籌6,000萬唔易，相信都要諗比冰桶挑戰更新穎嘅方法先可達標。
李八方
mailto:[email protected]