太古地產（1972）旗下西半山豪宅珒然，上月底賣出38樓極高層一伙，作價9,133萬元，按土地註冊處資料，買家係Mandy Lieu，名字跟傳聞於本月初被澳門已婚江湖大佬「洗米華」周焯華飛甩嘅混血名模Mandy Lieu一樣，而呢個單位係上月底買㗎喎。
根據資料，呢位買家Mandy Lieu喺上月24日簽臨時買賣合約，呢一日正好就係《壹週刊》影到名模Mandy Lieu與周焯華喺灣仔食飯又攬腰嘅日子。《壹週刊》跟住喺本月6日出版，該期封面就係爆Mandy Lieu與周焯華交往咗一段時間，女方之後亦喺微博承認戀情。
不過，事情發展峯迴路轉，翌日市場就傳出Mandy Lieu被飛，佢之後仲離港散心去。
尾數逾八千萬10月埋單
而珒然38樓呢一個單位就已經喺上月31日簽正式買賣合約，買家畀咗樓價5%，即係大約457萬元。根據合約條款，買家要喺臨約生效之後90日內找晒數，即係買家要喺10月底前畀八千幾萬元，或者搵到銀行做按揭先至正式完成交易。
珒然成幢只得30個單位，一年前入伙，跟太地喺司徒拔道53號嘅OPUS一樣，都係一梯一伙，外牆都有少少曲線形設計，所以有「迷你版OPUS」之稱，私隱度算高，38樓有海景。聽聞現時剩低三個分層單位同埋頂層複式單位未賣㗎咋。
李華華
mailto:[email protected]
