電視劇柴九（黎耀祥飾演）金句「人生有幾多個十年？」曾經熱爆全城，無錯，人生匆匆，最緊要痛快！咁喺同一個地方工作廿年，又是甚麼滋味？恒生銀行（011）公關大員、馬拉松達人張樹槐（水哥），今日就夠資格回應，1994年9月1日加盟恒生至今，一手創立該行企業傳訊部嘅水哥，做埋今日就踏入第二十個年頭！
時光飛逝，水哥話回頭看話「真係唔簡單」，其間唔少辛酸，但更多係感恩。對當年招聘他入公關部做開荒牛嘅前行政總裁歐肇基，尤其感激。
已故董事長、銀行界教父利國偉，德高望重，對佢待人處世，啟發不少。九七回歸，時任國務院副總理朱鎔基，曾經親臨恒生總行與利國偉一齊主持何梁何利基金（恒生元老創辦）頒獎禮，水哥謂有幸參與其中安排，至今仍歷歷在目。
稱水哥為恒生元老，絕不為過，跟他合作過嘅老闆，喺財經界可以話係粒粒皆星，包括四位董事長（利國偉、艾爾敦、邵銘高及錢果豐）同埋五位行政總裁（歐肇基、鄭海泉、柯清輝、梁高美懿及李慧敏）。
為紀念廿載情，水哥計劃自掏腰包，宴請新舊同事，今日去中環米芝蓮法國餐廳Amber擦番餐。周末假期，佢就計劃喺半山寶雲道，跑最少20公里半馬慶祝，實行登高望遠。