歷史性晉身亞協盃4強嘅傑志，將會硬撼處於烽火大地嘅伊拉克球隊伊比爾，雖然呢隊波之前8強主場賽事移師去黎巴嫩舉行，但事實上黎巴嫩𠵱家都立立亂，所以傑志總領隊伍健透露，已去信亞洲足協轉換中立場作賽。不過，最終轉唔轉到場都好，傑志嚟緊禮拜日先同南華角逐季內首個錦標︰香港賽馬會社區盃！
將喺下月16號及30號，先客後主鬥伊比爾嘅傑志，總領隊伍健坦言，4強有黃洋同徐德帥復出，對邊隊都唔驚，但就擔心個比賽「戰場」︰「對手之前嘅主場賽事都喺卡塔爾舉行，但因為當地近期要起世盃球場，所以改咗去黎巴嫩。但我哋今日睇新聞，見到比賽球場距離war zone只有26公里，所以已經去信AFC要求轉場。」
不過傑志擔心呢場亞協盃之前，嚟緊禮拜日先要喺旺角場同南華角逐社區盃。足總噚日舉行記招宣佈，呢個盃賽獲馬會贊助100萬港元，除咗冠、亞軍將分獲25萬同10萬獎金外，其餘7支港超聯球隊都可平均瓜分30萬。至於傑、南兩軍自行選定嘅慈善團體，亦可分別獲得10萬同5萬捐款；傑志揀嘅團體係基督教聯合醫院，少林寺就揀咗香港社區組織協會，佢哋嘅足主張廣勇喺記招先禮後兵，合照時搶先掂吓隻獎盃，仲同伍生講笑話：「唔好意思，我攞咗先喇！ 」
識睇，一定係睇足英台【英波Live】：
http://soccer.appledaily.com
http://bit.ly/engballlive