本年底到明年初，開始四年一屆嘅村代表、街坊代表同27個鄉事委員會選舉。上屆篡位成功推「新界王」鄉議局主席劉皇發落馬、做咗屯門鄉委會主席嘅何君堯，據聞上任後鞏固唔到勢力，仲喺鄉委會內處處辣着火頭，有傳佢為咗尋求連任，竟然搵返「對頭人」發叔打救。
鄉紳界流傳，何君堯近兩個月約過發叔飲茶，希望對方支持佢連任，仲引述何君堯話，只係想做多一陣，至明年9月、約新一屆區選提名就會讓返個位出嚟，但冇講係咪讓位後，會喺區選大作戰！八方想搵何君堯求證，但一直聯絡唔到佢；發叔就話：「間中都有同佢食飯嘅，但冇聽佢講啲咁嘅嘢，哈哈哈……」