24歲談退出有點奇怪，去年陳靜(DaDa)奪得金像獎最佳女配角後，因工作壓力患上抑鬱症，忽然宣佈退出，再而又閃速回歸，年紀輕輕，走的路似乎異於常人。訪問當日DaDa初病未癒，卻未想過放緩腳步，全情投入拍攝，就是這份頂硬上的精神，令合作過的前輩對她讚不絕口。抑鬱病癒後重新出發，工作再上軌道，感情仍處空窗期，坦言幾年沒拍拖，最擔心不是孤單寂寞，而是怕演戲沒有感情根蒂。
統籌：林妙萍
撰文及造型：鄧卓嶽
攝影：周樂恒
化妝：Kayte Fung
髮型：Kenny Leung
年輕有本錢自然緋聞不絕，原以為DaDa桃花旺盛，異性緣極好，不過她卻說自己女性緣更好，「唔係好多緋聞箒！我冇乜男仔friend，可能有啲自我保護，唔想有誤會。前幾年淨係掛住做嘢，感情免問，已經好幾年冇拍拖。𠵱家明白到拍戲其實需要喺生活取材，要進步就要培養吓感情生活，所以都開始同吓男仔食飯，識多啲人。」
低俗有道理
電影越拍越多，《喜愛夜蒲》做蒲精、《低俗喜劇》玩爆炸糖，還有《Z風暴》中被罵是妓女，角色偏向敏感，會否擔心被觀眾以有色眼鏡看待？「演過大部份角色好似都係比較可憐、悲劇啲嘅女仔，社會地位比較低，我覺得冇所謂，電影就係要藉由角色反映畀社會好多訊息。我都等緊有其他類型角色嘅機會，最想飾演聾啞人士，好耐之前第一次電影試鏡，個角色就係聾啞人士，試戲試咗成個幾鐘，最後都係冇被錄用。」
擔正女主角的新片《唐伯虎衝上雲霄》，荒誕片名一聽已教人笑到噴飯，DaDa收到劇本時，早早察覺不妙，「我都估到唔會咁益我俾我做秋香㗎喇！今次套戲好好玩，故事講時空穿越，又係第一次拍古裝，我做石榴姐(星爺套《唐伯虎》係苑瓊丹是也)，戲裏面仲講佢武功高強，自己其實係個運動白癡，舞吓劍都會扭親手，連擺pose都唔靚，所以之後都要上堂學吓基本功先得。」
身材不是禍
繼《低俗喜劇》後再與杜汶澤合作，DaDa對阿澤讚不絕口，「已經有一定嘅默契，所以拍攝時候我都好敢去問佢，有個前輩肯教真係幾幸運。今次喺橫店拍，成個劇組都病，又屙又嘔，但係阿澤依然好認真完成工作，病到打針都毫無怨言。」
談到DaDa，焦點總是落在其出眾身材，對於爽朗直率的她而言，似乎無傷大雅，「工作上絕對係優點，我都好感激媽咪賜畀我嘅所有，的確令我好快有知名度，自己其實好男仔頭，平日打扮較為密實，工作上我唔介意騷身材，不過私底下就唔好意思喇！」
抑鬱症過後
眼前的DaDa笑容燦爛，難以聯想到去年她被抑鬱症困擾，「之前病嘅時候好在有家人支持，本身係個好強嘅人，唔想家人擔心，所以好多心事都收埋唔講，唔開心、都市壓力好多人都有，但係喺幕前就變多咗一啲責任，𠵱家睇醫生之外，做運動都好緊要，同埋搵經理人、朋友傾偈，以前唔識搵人傾，覺得人哋唔係做呢行唔會明白，原來唔係，好朋友了解咗反而關係會更接近。」
非物質主義
一般年輕女仔都貪靚愛打扮，DaDa則覺得衣食住行，唯獨住這方面才值得花錢花心思，「平時真係唔想用錢，買衫主要為工作，食又好求其，返屋企有一個好環境比其他物質更重要。投資買樓買金係媽咪教落，𠵱家儲緊錢希望買間大啲長住。」對物質沒甚興趣，生日亦叫朋友不要送禮，反而想將這些心意送給更有需要的人，「今年生日想做善事，就叫埋啲朋友一齊到內地山區幫助小朋友，就算去唔到啲friend都捐咗好多物資，呢個生日過得特別有意思。」
更多精采時尚內容，盡在 http://add.appledaily.com。