特首梁振英最鍾意搞中港融合，而作為佢忠實擁躉嘅「梁粉」瑞安房地產（272）主席羅康瑞，當然都要略盡綿力幫手喇。瑞房噚日公佈業績，羅康瑞就借份業績通告，充份落實同體現出中港融合嘅偉大精神嘞。
皆因羅康瑞喺「市場展望」一節，竟然可以繁體字同簡體字並用，同一時間照顧到兩地投資者，認真有計。
不過，羅康瑞嘅繁簡夾雜寫文方法真係好有特色，喺同一句裏面，可以喺上一個字用繁體寫，下一個字就轉用簡體，要做出呢個格式認真要花心思。
雖然港交所（388）冇規定上市公司出通告唔可以繁簡並用，而現時好多香港人都識得睇簡體字，但作為一間香港人打骰嘅香港上市公司，會唔會都係全部用番繁體字好啲呢？一篇文入面，又繁又簡，睇落好唔順眼囉。