【動開學】可嵐𠱁仔剪髮迎K1

可嵐母兼父職湊住3歲半囝囝尤俊（Eugene），今年阿仔升K1，為咗迎接新學年，阿媽比囝囝仲緊張，可嵐日前帶Eugene剪髮、影學生相同買新鞋，兩母子頻撲咗成個晏晝。

手機加薯條侍候

剪頭髮時，可嵐出動手機畀Eugene睇卡通片，再搭一包老麥薯條，成功𠱁掂囝囝黐實張凳，髮型師為佢剪咗萌爆齊蔭頭。跟住下一站去咗影學生相，小小年紀的Eugene對住相機chok出樣。影完學生相，兩母子就去買學生鞋，Eugene一入店就自動波去揀心水鞋，可嵐話囝囝雙腳大得快：「為免頂趾唔舒服，每隔幾個月就要買新鞋。」
單親媽媽可嵐自問對囝囝管教好嚴，佢話：「唔會縱佢，有獎有罰。佢要扭計買嘢，我冇情講，立即返屋企。」Eugene升K1係進入另一新階段，可嵐話會從旁指導囝囝學執書包，等佢養成獨立嘅習慣。