樂意餐廳經營40年，竟然一直租用別人物業，最初喺灣仔柯布連道，1986年至今就喺𠵱家告士打道嘅位置。Alex呢位老闆謙稱幾兄弟只係打工仔，並非企業家，餐廳生意普通，所以冇能力買舖，因此，佢哋都要面對租金上升壓力，剛續租兩年，佢都唔知將來能否頂住加租壓力。
Alex有感而發話，業主以前將物業租畀食肆，由於裝修費龐大，所以租約起碼5年，𠵱家業主成日想加租，租約期減至兩年，租客唔想另覓舖位花錢裝修，唯有焗住交貴租。樂意呢個舖，28年前月租5.7萬元，𠵱家係28萬元。Alex透露，計埋租金、食材、人工，每月基本開支要130萬元，近年生意只算不過不失。
樂意平日依賴午市嘅寫字樓客，午市價單相對實惠，每人平均消費大約160元，周六、周日冇乜寫字樓客，就主要做晚市熟客生意。