雖然新老闆馬雲特登現身捧場，仲出埋2,000萬人民幣（約2,500萬港元）嘅「男人獎金」激勵士氣，但衞冕嘅FC廣州（恒大）都要喺亞冠盃8強出局。恒大噚晚主場以2:1反勝西悉尼流浪者，總比數踢成2:2，可惜對手有作客入球而出局。
為咗鼓勵班球員反勝，早前入股恒大嘅阿里巴巴老闆馬雲噚日中午嚟到廣州同球員打氣，仲開出2,000萬人民幣嘅「男人獎金」，無論戰果係點都會發放，希望全隊可以好似男子漢咁戰鬥。呢次係馬雲入股恒大後首次同球員見面，佢噚晚拍住恒大老闆許家印，一齊去到天河體育場睇波，支持恒大。
艾傑臣「宴客」累事
賽前有段小插曲，西悉嘅隊巴喺開往球場途中發生意外，被撞到車尾，但好彩冇大礙。恒大呢場被迫大變陣，因為金英權、張琳芃同埋郜林停賽，就連教練納比都要坐波監，只能喺看台上食住雪茄遙控督師。恒大唯一嘅好消息係隊長鄭智復出，同黃博文坐鎮中場，可以推迪亞文迪上前線，拍住艾傑臣同基拿甸奴，合組外援三叉戟。
恒大恃主場之利，壓住西悉進攻，首回合領先1:0嘅西悉亦樂意打穩守突擊。西悉嘅突擊亦有睇頭，馬克布歷治放冷箭，恒大門將曾誠僅僅用心口擋出。31分鐘，恒大有一次黃金機會，艾傑臣突入禁區，博到對手拿洛卡犯規獲得12碼，但艾傑臣主射被西悉門將高域撲出，半場0:0。
恒大下半場繼續狂攻，但後防出錯，曾誠踢跌馬克布歷治輸12碼，杜米祖歷喺59分鐘操刀射入，為西悉取得作客入球，兩回合領先2:0；恒大要入3球先可以出線。兩分鐘後，基拿甸奴一頂，迪亞文迪射入，瞬即追成1:2。完場前，艾傑斯臣為恒大建功，助球隊今場贏2:1，總比數追成2:2，但恒大都輸作客入球被淘汰。西悉晉級4強，會同FC首爾爭入決賽。
識睇，一定係睇足英台【英波Live】：
http://soccer.appledaily.com
http://bit.ly/engballlive