法庭噚日開審港視不獲發免費電視牌嘅司法覆核申請，引證八方早前話事件會喺政府引發風暴所言非虛，事關港視引述行會開會紀錄話，有行會成員擔心引發割喉式競爭，要求檢討無上限嘅做法，同狼英心意一致，唔想畀牌魔童啦！呢位阻港視發牌嘅人係邊位，噚日喺官場成熱話；唔少人估係張志剛，話佢同狼英塞卡片蘇食死貓！
張被指發言好積極
有官場中人笑指，魔童早前話商務及經濟發展局局長蘇錦樑對佢恩重如山，仲叫佢淋冰「找數」，而卡片蘇竟然不惜犧牲chok look變身河童頭，誓要同魔童冰釋前嫌，已經預告阻止魔童嘅一定唔係卡片蘇。噚日法庭披露嘅行會文件，就還卡片蘇一個清白，因為卡片蘇傾向發牌給三個申請者，只係狼英之外，仲有行會成員從中阻撓，話擔心多咗個免費牌就會割喉式競爭云云。
到底乜水搞到大家喺屋企開着電視冇得睇港視？官場中人紛紛笑指，唔係忠心梁粉張志剛，仲有邊位咁封閉？有官場中人話呀，聽聞行會討論港視發牌問題時，張志剛發言好積極，相反其他人就比較沉默，可能大家都忍夠無綫同亞視嘅爛透，可惜都敵不過一男子加上一擦鞋友嘅一錘定音。又難怪硬食死貓嘅卡片蘇，講到唔向港視發牌時都哽咽受屈辱嘅！
李八方
mailto:[email protected]