恒指一直喺Prof J嘅9日線系統造好，真係吹佢唔漲，我睇24900點係非常之重要支持，加上港滙強，有水入，市唔郁，係要等成個氣氛之下先行，唔係浪費子彈又何必呢。
25000點不破還需破，10月互聯互通加阿里未開定門攞錢應該繼續推上去，係唔係？
自從互聯互通消息開始，Prof J收到嘅冧巴多到數唔晒，大部份來自我內地嘅基金朋友（話就話基金，幾千萬元人仔，我哋稱之謂金主）喺香港市場走一轉，令到股價飛升無限嘅神秘力量，點都好，順勢而行係非常重要。
買TCL多媒體最放心
其中三隻，Prof J好想同大家分享，第一隻，第一次提嘅泛亞環保（556），8月中旋風式由1.6元左右，炒上去最高2.25元，睇到呆咗，之後陰住回。
上周五成11點先出業績，當然係好嘢，再衝入去，以一招大海無量震散你，功力少啲都要瓜老襯，睇價量成交確係重要，但分析唔同大戶朋友參考就更加得意。
Prof J試過分析，發現大戶推大咗成交，但係無買入，亦都無賣出，似乎佢哋為大家嘅前哨戰做好準備，都係嗰句，講咁多你哋咁聰明，應該收到，係唔係？
另外一隻上周提過，TCL多媒體（1070）由今年6月底部2.53元一吻後，就以上上落落嘅形態走咗上去，淨資產值3.2至3.3元，買佢最放心，加上阿爺又開始放風，新一輪家電補貼又開始傳，大家記住留意。
第三隻係時代地產（1233），半年業績幾唔錯，銷售有成60.2億元咁多，按季增加三成，加上時代地產差唔多每個省份都有發展嘅項目，預料未來發展會加快，時代亦同咗Schiavona Investment Holdings Ltd發行本金可換股債券，財技動作帶出新點子，預料會有更多資金發展地產項目，大家繼續追蹤，出發！
徐燦傑
齊魯國際控股首席策略總監
本欄逢周四刊出