塘福懲教所噚日舉行「木模板工藝課程暨中式廚藝及酒樓服務證書課程」結業禮，25個所員順利畢業攞證書。八方同唔少學員傾過偈，佢哋都話曾經想放棄，多得導師同家人支持先堅持落去。
其中年底服刑期滿嘅阿明（化名）啱啱學完中式廚藝同酒樓服務，佢話最難適應熱廚房環境，仲即場用雞髀肉、蝦球整咗味「百龍獻瑞」，示範「拋鑊」，盡顯大廚風範。佢話見到導師食完自己第一次煮出嚟嘅揚州炒飯讚不絕口，覺得好開心，所以堅持繼續學，希望出到社會繼續鑽研廚藝，去屋企人開嘅酒樓幫手。
而塘福懲教所個訓練廚房，大雪櫃、中式鑊同蒸爐一應俱全，唯一同真正廚房唔同嘅係無得明火煮食。懲教署監督楊賢妙話，喺跟進到課程嘅飲食業學員裏面，多過四成入到行，希望佢哋學以致用。