未來戰士阿諾舒華辛力加殺入香港！里昂每年在港舉行投資論壇，定必邀請猛料名人來港，里昂今年就搵來阿諾下月17日出席論壇做演講嘉賓。阿諾套電影《轟天猛將3》下月上畫，佢又接拍咗最新一集《未來戰士》，唔知佢會否伺機大賣廣告呢？
舊年打八號風球都冇取消嘅里昂投資論壇，叫座力十足，今年請到阿諾，佢唔止係未來戰士咁簡單，仲做過7年加州州長，應該有多方面經驗可以分享。
里昂一向噱頭多多，每年年頭以風水角度預測股市，下半年就有呢個投資論壇，嘉賓更係粒粒皆星，有段時間以政界名人居多，例如克林頓、戈爾、格林斯潘同埋2009年來港嘅佩琳。2010年後就多數係娛樂界名人，《教父》導演哥普拉、型男佐治古尼、拳王泰臣都來過，舊年就有萬人迷碧咸。