上網bid嘢好多人都試過，但原來唔一定價高者得，新成立嘅競拍網「uBidiBid」就向港人介紹一個bid嘢新玩法「獨家出價拍賣」（unique bid auction），連拍賣品都創新過人，有車有樓有𡃁模（慈善飯局），一律用唔高於原價1%就有機會bid到。即係話，一個500萬嘅單位，分分鐘唔使5萬蚊就買到。
創辦人梁展鵬話呢種模式喺美國出現好耐，要bid到一件貨，關鍵係玩家出一個獨一無二嘅叫價，最高者為勝。但玩家要先買佢哋5元一個嘅「U代幣」叫價，每次叫價要畀一定數量嘅代幣，件貨賣得出，無論有冇bid贏都冇得refund；如果叫價次數未達系統設定下限，個盤會取消，代幣退回玩家。