金風科技（2208）噚日停牌，令唔少資金轉移追入其他風電股。當中，中國風電（182）都應該係時候爆發。
原因好簡單，基本因素好，公司半年業績理想，純利激增2.14倍至1.23億元；另外，技術上突破0.7元大阻力位，成交配合；第三，呢隻股份第二大股東，就係近期當紅股壇高手高振順，持股22.36%。高振順近來再施展奇技，將先豐（500）、英發（439）、瑞東（376）炒到癲。
概念、基本因素、技術走勢齊晒，滿足晒爆升前三個願望！同樣係風電股，華能新能源（958）之前業績好過預期，股價突破小雙頂，其後整固後噚日逆市再炒上，目標3.5元。
財技了得嘅除咗高振順外，陳國強都係另一個殼王。陳國強最近場外增持星美國際（198），持股9.3%，而星美國際承諾認購旗下星美文化（2366）供股股份。星美文化最近動作多多，最新與土豆網達成戰略合作，未來兩年合拍網劇、又一齊投資電影、電視劇。
要知道近年內地嘅電視、視頻產業蓬勃，仲創咗唔少TVB（511）收視，作為TVB嘅大股東陳國強，又點會睇唔到箇中商機？今次陳國強增持，變相曲線睇好星美文化，連殼王都睇好，星美文化話唔定有後着。
Fifi
http://www.facebook.com/lovefrystock
本欄逢周二、四刊出