小時候忘了是看「滿東華」定「耀保良」，總之就是同類型的慈善騷，當中有一個環節是，唔知邊個善長仁翁，捐錢出來要譚炳文現場表演生吞一湯羹的「辣椒油」，當時只得十歲八歲的我，看得心驚膽顫之餘，不停問身邊一位現已過世的長輩，「點解做善事要害人？」當時的我只能這樣表達自己的心情，而那位長輩即修正我的講法：「呢啲唔係害人，係幫人，阿譚炳文又唔係冇人工收，食羹辣椒油就有人肯捐錢，善有善報，佢自己都積咗個福啦！」當時的我心在想，如果第時我有錢，就可以捐錢叫戚美珍剝衫，我幫到人，佢有福積仲有人工收，怪不得人家說「為善最樂，不甘後人」！
做好事要有好報？
到我十六、七歲，有一次又跟這位長輩出街，他突然給了我一百元，然後跟我說「你過去畀瞓喺街嗰個乞兒！」那個年代一百元不是一個小數目，就算像我那麼親的，過年時收到他的利是都是五十元，但他對這位不認識但有需要的人士卻那麼闊綽，那刻我確實欣賞這位長輩，果真做到「為善最樂，不甘後人」！於是我一個箭步走上前，開心地把一百元放進「乞兒兜」內，而當我回到長輩身旁，他就充滿信心跟我說：「善有善報，你做咗善事，會保佑你升到大學！」那刻我忍不住口就回答：「畀一百蚊就可以升到大學，咁我唔使讀書啦！」長輩回答：「讀書梗係要啦！但運都好緊要，總之做咗善事，好心就有好報，好報就係好運！」
終於我上不到大學，那長輩離世時也捱了一段不為人道的生活，這算不算是「做好心都無好報！」但我想問：「點解做好事要有好報？」
抗拒「大龍鳳」行善
所謂「善事」其實不是一項工作，所以你做完是應該沒有回報，所謂「善事」其實只不過是簡單的去幫助其他人，幫完就算，不想幫也可，不用巧立名目，甚至以討價還價的心態出手「我幫咗你，有乜事你要幫番我呀！」幫助其他人都只是舉手之勞，毋須要搞場「大龍鳳」去強迫其他人幫手，或許世上大部份人，都要靠「大龍鳳」才懂得行動，但亦有些人像我，對這種連鎖式的「邀請」，是極其抗拒，而在大氣氛之下，像我這些人就會被不同的人游說去參加這場「大龍鳳」，否則我們就是沒血性的人！但其實無論你覺得我是甚麼人，我都不會像譚炳文那麼儍！危害自己身體去幫助其他人，或許你認為我的睇法是錯，那讓我錯到底吧！請不要再要我找數，我沒欠過你們甚麼！
【鄒四的夢幻之旅】
撰文：鄒凱光
集編劇、導演、演員、主持於一身的中年漢，有着男人的浪漫。
本欄逢周四刊登