記得去年央視曾鬧爆Starbucks嗎？它說中國經營成本低，但在北京飲一杯Tall Latte竟然要27蚊人仔，指Starbucks「謀取暴利」。報道一出，內地網民狠批央視「無聊」。價格是反映市場供求，唔一定跟足成本走勢，如果真係賺過龍，自有競爭者出手；咖啡又不是必需品，何須官媒多把口？
不過，這頂名為「謀取暴利」的帽子，過去一年依然無停過，輪住戴在各外資企業頭上。最新中招的是外資車廠，Benz、Audi，日本零件廠等，都已被迫減價。
內地監管汽車市場，從來是為支持本土品牌發展。由以前外商入中國一定要和本地企業搞JV，到近年甚至「鼓勵」外資廠開發全新「中國品牌」，再交畀本土合作夥伴經營。種種政策，無非想促進國產車「技術提升」，嗱，唔好話「抄」，「學」吓嘢都得啩？可惜扶不起的阿斗，學無所成，國產車市佔率仍年年下跌。
今次阿爺再出手，逼外資車廠零件減價，到底葫蘆裏賣咩藥？從最近一段新聞或可看出端倪。據德國報章引述汽車零件廠Elring Klinger的CEO話，中國近日告知幾家德國廠商，未來唔會再允許單獨經營中國分公司，一定要搞JV。即係多年來閉門「學」造車都無用，現逼到要「學」埋人哋點生產零件？
如果真係咁樣，同打劫有咩分別呢？
海迪