長實（001）夥拍南豐合作發展將軍澳日出康城，至今已經賣咗第一同埋第二期，去到第三期緻藍天，兩間公司繼續合作。噚日長實董事黃思聰、南豐售樓部經理陳彥群同埋南豐董事麥一擎齊齊現身樓盤簡介會，向一眾代理教路點樣硬銷個盤。開會前，三位坐埋一齊密斟，黃思聰指手畫腳係咁講，麥一擎就摸晒下巴陰陰嘴笑，唔通佢哋度到條賣樓嘅絕世好橋？
有乜好橋就未知，但黃思聰就肯定度好條line去寸新地（016），事關緻藍天過千伙，全部係三房、四房大單位，黃思聰噚日就強調，「我哋嘅廚房係不設開放式廚房嘅」。擺到明係踩新地喺同區嘅天晉IIIA有六成單位都要用開放式廚房喇。