小蜜蜂，嗡嗡嗡，差啲嚇瓜兩個中女。34歲嘅美國球手威廉絲（大威）同下月就44歲嘅日本球手伊達公子，周一喺美國網球公開賽女單首圈碰面，齊齊喺比賽期間俾隻小蜜蜂搞到花容失色。
蜜蜂突闖女單首圈
大威今場對伊達公子先失一盤2:6，之後連贏兩盤6:3，最後以盤數2:1反勝，次圈鬥瑞士嘅芭辛絲姬。場波原本冇乜特別，但就俾一位不速之「嚇」搞到有啲睇頭。話說比賽期間突然有隻蜜蜂出現，喺大威同伊達公子面前飛來飛去，仲曾經停喺大威塊拍度，搞到兩位女士咿嘩鬼叫；最終3個工作人員幫手，用手巾包住隻小蜜蜂，場波先可以繼續。
今場13次破發嘅大威話：「隻蜜蜂真係好難搞，不過伊達公子更難搞。」講到對手大自己10年，大威就話：「今場波我肯定係後生啲嗰個。但當你落到場，冇人會諗你係幾多歲，呢個只係數字。」
大威俾隻小蜜蜂搞到頭暈，同日33歲嘅瑞士球手費達拿，就俾「波神」米高佐敦電暈；佢巧遇嚟睇波嘅波神，即刻由網球天王變咗做籃球小粉絲，攞部手機同波神自拍，仲將張相掟上twitter㖭。
識睇，一定係睇足英台【英波Live】：
http://soccer.appledaily.com
http://bit.ly/engballlive